برسل لسيادتك دعوة اسمع و انصت
لمزامير تدوي في آخر صفوف الشجعان
طبول الحرب يسمعها الأصم قبل الفرسان
شرود صابك و لا ده داء القوة و السلطان
ده الي يبيع في يوم الدم ما يستاهلش الإحسان
فيران تركض في كل مكان
و سوس العفن بينخر في البنيان
يا تلحق تبيد آفات البدن
يا تستنى وقوع السقف عالسكان
معادش بينفع الحكم بالفرمان
الباب العالي هده الطوفان
و قوة طوفان البشر أبقى و أقوى
برسل دعوة ليك انت اسمع و انصت
تلوم الحق على غضبه
و تدي للظلام أعذار
تقول ده رأي و وجهة نظر
لكن للنفوس أسرار
و زيك واقف بيتفرج
كأنه سيرك أو مهرجان
ليه مشلول يا محترم
جمود صابك و لا وهن
يا تتعارك يا تتركن
يا تنزع صك ملكيتك بإيديك
يا تعيش في دارك كما الخدم
يا تعيش إنسان في الإنسانية له قيمة
يا ترضى وسط الجموع تعيش كما البهيمة
يسيروك من غير ما تعرف رايح فين
و في آخر الليل يقفلوا عليك الحظيرة
يا تصون غلاوة الدم الي سال
يا تعيش جماد بلا روح كما الصلصال
يا تطوي صفحة العبودية و تحرقها
يا تنحبس جواها و أنفاسك تسطرها
يجيني الرد على كل الجوابات
مليش دعوة
مليش دعوة بغيلان الخوف
مليش دعوة مهما أشوف
مليش دعوة أنا للزفة و الفرحة
مليش دعوة في جوف الليل أنا بصرخة
مليش دعوة أنا بعقول للجهل رادخة
مليش دعوة ببلد تاخد ولا بتدي
مليش دعوة بالواقفين في الطريق ضدي
مليش دعوة بأب ينام مقهور
لما ابنه من الجوع ينام مبتور
مليش دعوة
و حتى لو يوم وصلني دعوة
يا في قسمة التركة
يا على حساب الكريم عشوة
مليش دعوة أنا بالوطن
و لا ليا في أي مكان أنا دعوة
يا مولانا
يا تايه في الضروب غفلان
كل الدعوات معاك
بس انت ذاكرتك هي الي خايناك
أو يمكن مهيش لازماك
بس أقولك
بيك أنا كمان مليش دعوة
ليست هناك تعليقات:
إرسال تعليق