في عز الحر عز الصيف
جوا قلبي خريف
ورق الماضي بيتساقط
و أيامي بتمشي بحفيف
تجر وراها أشلاء لضحكة
و كومة قش مهر أليف
شريط أحداث مشاهده شبهي
مرايتي رافضة تصارحني بملامحي
طبعة خطاوي على الرملة
بتابعها و شايفة صاحبها قدامي
و ماشية وراه
يهدي أهدي يمكن ألقى نزل
و ألاقي طول طريقي و سكتي هزل
ريح تهب تطير بقايا مني
ألاقيني غصب عني نزحت
عايزة أبطل احلم
تتبخر أمالي
عايزة أبطل ارسم
تتمحي ألواني
عايزة ابطل ابتسم
تنتصر عليا أحزاني
عايزة ابطل أغني
ميتسمعش موالي
عايزة أبطل ابني
يتهدم بنياني
عايزة ابطل اكتب
تتكسر أقلامي
عايزة ابطل اعشق الوطن
اكتشف إن حبي شجن ملوش داعي
عايزة ابطل اثور
اقع على جذور رقبتي تتكسر
اشيد في الرملة قصور
موجة بحر تغرقه و تنتصر
يشبك عقدي في السراب
لؤلؤه يتنثر
و لما احاول اطير
يمنعني إني من جنس البشر
ساعات بيكون بودي
اجري عالفرح و اتمحك في الرضا
البس هدوم كل فلتة عقل على حدى
اصرخ و اشخت و اتخنق
لما اكتشف إن صوتي ملوش صدى
الخماسين ساكنة ضلوعي و معششة
و عجينتي مش ناقصها غير شوية نشا
طفشاني ده من نوع مفتخر
هيجان و غضب و تراب و عفر
نويت في ضروب المواسم ابدأ سكة سفر
لكن حمولي تقيلة و ذنبي غير مغتفر
