إليك ملخص عني

إليك ملخص عني

لم أتعب يوما من التمني

أحلم بك و أرسمك في خيالي

و لكنني لست مستعدة للقائك في الوقت الحالي

أرغب في تحقيق ذاتي

كم من الصعب أن أحافظ على ثباتي

يا من في خيالي فكرة 

يا ليتك كنت حتى ماضي

لكي أطمئن أنني قابلتك و أنك حقيقة

و لست مجرد إطارا فاضي

تختلف الصور و الأشكال و الأسماء و المعاني

و لكن تظل أنت الحاضر الخافي

إليك ملخص عني 

حتى إذا ما جئت لا يفوتك لحظة من عمري

انتظرك و سأظل انتظرك حتى يمل الإنتظار مني

لن استعجل لقائك فمتى و أين لا يهمني

و إن لم تأتي أبدا فتأكد أن غيابك لن يضرني

فأنا بنفسي و عقلي كيان

و إذا ما كان وجودك و غيابك سيان

فلا أريدك في أي عصر أو زمان

و سأمزق هذه القصيدة و أعتزل الغرام

سأكرهك مع أنك من نسج المرام

و مع ذلك أعلم أنك تنتظرني كذلك

أعلم أنني فكرة و صورة في خيالك

لذلك إليك ملخص عني

حتى القاك و تعرف التفاصيل مني....

أرجوكم احذروا خفافيش الظلام!

على مدى شهر و هو عمر الثورة حتى الآن لم نرى نزاع طائفي واحد,لم تهدم كنيسة أو يؤذى مسيحي,رأينا أجمل صورة في العالم للوحدة الوطنية,المسيحيون يحمون المسلمين و هم يصلون و المسلمون يحمون المسيحيين و هم يصلون و لم يكن هناك فرق بين مسلم و مسيحي في ميدان التحرير و لا في أي مكان في مصر.و تردد الهتاف الرائع "مسلم مسيحي انت مصري"!إيه الي حصل؟؟؟!!مرة واحدة أصبح هناك فتنة طائفية؟؟!!مرة واحدة يقتل المسلمون و المسيحيون بعضهم!!ليييه؟؟!!طب لماذا لم يحدث هذا إلا بعد تولي عصام شرف الوزارة و سقوط أمن الدولة؟؟!!!يا ريت أولا نتذكر أن بعض رموز النظام مثل صفوت الشريف و زكريا عزمي ما زالوا طلقاء و كذلك تصريحات إسرائيل من البدء عن خسارتها لأهم حليف لها في الشرق الأوسط ثم بعد تولي عصام شرف منصب رئيس الوزراء حيث صرحوا عن عدم إرتياحهم لحكومة شرف و أنه معادي للسامية و عدم ترحيبهم لتولي نبيل العربي وزارة الخارجية بسبب مواقفه المؤيدة لفتح معبر رفح و إذا كان كل هذا مجرد أوهام فهناك شيء أكيد و ليس بأوهام و لا مجرد نظريات و هو إرتباط ما يحدث الآن من أحداث طائفية بسقوط أمن الدولة!!هذا الجهاز الشرس الذي ظل يتحكم في مصر من كل النواحي لأكثر من 30 سنة و كان يتمتع بسلطات مطلقة و ارتكب جرائم ترقى للخيانة العظمى كيف يسقط بدون قتال؟؟!!كيف سيرضى عناصره الذين اتحدوا مع بقايا النظام الساقط على أمل أن ينجوا من الحساب!!من الآخر عايزين يولعوا في البلد عشان يعرفوا يهربوا!!الأول لموا الناس حولهم عشان يستفزوهم فيلاقوا الوثائق و يفقدوا الثقة في كل الشخصيات العامة المشهود لها بالشرف و إلا كيف تفسر الهيصة الي كانوا عاملينها و هم يتخلصون من الورق ألا يستطيع أمن الدولة بجلالة قدره أن يتخلص من قذارته في هدوء و لماذا حرقوا ورق و تركوا ورق آخر؟؟!!!و كلام عمر عفيفي من مصادره أن هناك مؤامرة تدبر من 42 ضابط أمن دولة لخلق فتنة طائفية و اغتيال شخصيات عامة قبطية و مسلمة و التخلص من العادلي لكي يلهوا المصريين و يهربوا!!و الأنباء عن ضلوع مخبرين من أمن الدولة في تأجيج الفتنة و هدم كنيسة صول!أنا لا أبرر ما حدث فهو خطأ بكل المقاييس فقد أوصانا الرسول صلى الله عليه و سلم بأهل الذمة و أقباط مصر خاصة و لا يجوز أبدا الإعتداء على كنائسهم و لا أموالهم و لا طردهم من بيوتهم و يجب أن يحاسب كل من فعل ذلك!أنا بس عندي رسالة واحدة لكل المصريين وحدتنا في قوتنا متخلوش حد يخدعكم أبدا و لا يوقع بينكم, مصر عمرها ما كان فيها فرق بين مسلم و مسيحي و لم يعرف أبنائها هذه الفروق و قد أرينا العالم كله كيف تكون الوحدة الوطنية أرجوكم أرجوكم متخلوش مخطط خفافيش الظلام ينجح لا تدعوا دوامة الفتنة الطائفية تبتلعنا!نحن أقوى و أذكى من ذلك!و في النهاية الوطن مركبنا كلنا إذا غرق سيغرق بنا كلنا و لن يصل إلى بر الأمان إلا بنا كلنا أيضا!لا تعطوهم الفرصة كي يدمروا بلدنا!فليتحلى كل منا بالعقل و يوعي من حوله بخطورة ما يحدث و يعالج ما يراه من تعصب!رغم كل هذا في داخلي أمل و تفاؤل و إحساس أننا سنعبر كل هذه المحن و سنصل إلى المستقبل الجميل فالشعب الذي ثار على الفساد و غير الأمر الواقع لن يترك بلده تقع في هذا الفخ!فليتذكر كل منا ميدان التحرير و كيف ذابت الفروق بين عنصري الأمة و في النهاية مسلم مسيحي انت مصري!!

The runaway dove.

Love is a feeling of happiness and fear

Hard to find and hard to bear

Easy to loose but difficult to keep

With it's roots dug in the heart too deep

You are a part of my soul

You complete my goal

You keep me in one piece

You lead me to my inner peace

Love knows no age 

It's a happiness rage

Can't be controlled

Can't be put on hold

You make sense of what I say

You are my light in my way

I swear you have my word

On it witness the Lord

That you are my one and only love 

Even if you were a dream,Even if you were a runaway dove.

(4) قصائد ما قبل الثورة

عز
عز يا أمين على الوطني
فيك حاجة بتقلب بطني
دايما قالب بوزك
و عمال بتزود في فلوسك
زي برغوث بيمس في دم
واحد غلبان غرقان في الهم
طلعت زي عفريت العلبة
محدش عارف جيت منين و لا إزاي دخلت القبة
يا راجل ده انت عمركما نمت جعان
إزاي مقتنع إن الشعب كده شبعان
بتخطط و تسستم انت و أصحابك
و بتعمل كل الي يضمن تأمين حسابك
عز يا عز فيك شيء مستفز
الشعب بياكل عيشحاف و انت بتاكل بط و وز

(3) قصائد ما قبل الثورة

مجلس السرقة و النهب

موعد الإنتخابات أهو جيه

هتدفع كام يا بيه

مش معقول هنتخبك ببلاش

يا سيدي اعتبرني حتة قماش 

من الي مغرق بيهم الشوارع

مكتوب عليها انتخبوا رجل المنافع

الي هيشغلكم و يلبسكم و يأكلكم

و بعدما يدخل المجلس أدي دقني أهيه إن عبركم

ما هو أصل سياة النائب واخدها سبوبة

و في الآخر هي مسرحية و لعبة محبوكة

الراجل يبقى حرامي و واكل مال النبي

و يصرف ملايين على إدعاء الشرف و انت تصدقه يا غبي

المفروض يغيروا اسمه من مجلس الشعب 

و يبقى اسمه مجلس السرقة و النهب

(2) قصائد ما قبل الثورة

صباح الخير يا مصر

صباح الخير يا مصر إزيك إنهارده؟

بقينا في أنهو عصر و لا انتي لسة شاردة

ماسكة في تاريخك و في نيلك و للتقدم رافضة

يا ستي معلش تعالي على نفسك و اتمشي شوية بدل ما انتي قاعدة

الناس بتجري و تسبقك و انتي حتى على الزحف مش قادرة

أديني نبهتك أهو و حاولت اساعدك و الناس عليا شاهدة

خليكي في أصحابك إلي بالجزمة منهم واخدة

صباح الخير يا مصر ولا انتي خيرك خلص؟

بطلتي تدي ولادك و تزعلي لما ابنك يزعل و يتقمص

و يهج و يسيبلك ترابك و سحابتك السوداء و الحرس

صباح الخير يا مصر صباح الفول و الطعمية

صباح الخضارالمسرطن و ماسورتك الي ناشعة مية

صباح الحرامية الي ناهبين ثروتك

ما بقاش فيكي حاجة طب هتديهم إيه هدية؟

إيه رأيك في شعبك يبقوا عندهم عبيد 

و الله هدية تليق بمقامك هما شعبك دول شوية

صباح الخير يا مصر طب و الله بحبك

بس ما بقتش قادرة اسكت على ظلمك

و المصيبة لا قادرة أعيش فيكي و لا بقدر على بعدك

يا ريت تخفي على ولادك شوية ده احنا برده اسمناشعبك

و لا احنا مبقاش لينا فيكي و فقرنا و سملرنا مش عاجبك

صباح الخير يا مصر و الله حالك عجيب

لا ليكي غالي و لا ليكي حبيب

بتدوسي على ولادك و مطلعة عينيهم

و هما فيكي بيزرعوا و يبنوا بإيديهم

يطلبوا منك خيرك تديه لسجانهم

و انتي لو طلبتي الحماية يفدوكي بحياتهم

فيكي طيبة و أصالة و غلاوتك تزيد عن أي غلاوة

و الي يتولد فيكي يحبك مهما زدتي عليه قساوة

عاملة زي المركب الي قربت تغرق

و الي عايز يعيش ينط منك قبل ما يعلق

بس لو كلنا نطينا و سبناكي

مين بحياته و بماله و بروحه يفداكي

و لو هربنا منك هنهرب فين من الحنين و الشوق

أصل حبك ده عامل زي الطوق

بيخنق العاشق و بيربطه بيكي

و لو مرة حاول يبعد تندهيه بعينيكي

صدق الي قال عليكي زي النداهة

حبك ده شيء يبان على المصري بالبداهة

صباح الخير يا مصر هو انتي لسة مصر؟

(1) قصائد ما قبل الثورة

قصائد ما قبل الثورة(1)

كلماتي

يااااااااااااه بقالي سنين ما مسكتش ورقة و قلم و كتبت

 لغيت ما خلاص صوتي اتخرس وقربت أموت من الكبت

 كلام محبوس في قلبي مش راضي يطلع

خائفة أقوله تقوم معاه روحي تطلع

ماهو أصل الكلمة دي بنت الروح

تتولد في النفس و بسرك لا يمكن تبوح

إلا لو أذنت لها و حررتها

تخرج كأنها مركبة بتدور على مرسى لها

ساعات تخرج ملهوفة مستعجلة

و ساعات تتمشى بهداوة مسترسلة

و ساعات تبقى صرخة تهز جبال

   و ساعات تبقى كذبة و لعب عيال

وساعات تبقى صادقة تعبر عن حالك

و ساعات تبقى سلعة تشتريها بمالك

أنا بقى كلماتي اتخنقوا

من كتر ما اتحبسوا

مش عارفة اقولهم من كترهم

و لا عارفة اوصلهم من بعدهم

المهم إني مسكت ورقة و قلم و كتبت

ومع ذلك لسة برده هموت من الكبت

الصمت ده مرض خبيث

ضيف لا مرحب بيه و لا هو حسيس

يقعد على قلبك يقرف فيك

لا عارف تطرده و لا هو حاسس بيك

الصمت ده بعيد عنك داء

الصمت ده وباء

و الي يجيله لا ينفعه طبيب و لا علاج

ما يطيبش منه غير لما يكون للكلام محتاج

عودونا في المدارس ما نكتبش غير الواجب

يحفظونا كلمتين نقرهم في الورقة و أهو ده الي عاجب

عايشين في جهل و فقدان هوية

أيوه جهل!هو إنك مش عارف تاريخك ده شوية؟!

الكتاب مش بنشوفه إلا لو كان كتاب وزارة

والشعر ما بنسمعوش إلا لو معاه طبل و زمارة

بالذمة كلماتي غلطانة؟!

ماهي أصلها شايلة و مليانة؟!

كلماتي أعلنت الثورة على صمتي

و رفضت اليأس يكون وطني

قررت تعلن استقلالها و استقلالي

و تعبر عن حالها و عن حالي

رجعت صاحبتي بعد طول غياب

 من غير خصام ولا عتاب

طردت خوفي ال كاتم على نفسي

و ال لا مبالاة ال كاتمة حسي

  انت بقى كلماتك حرة و لا مكتومة؟

يا ترى كلماتك ظالمة ولا مظلومة؟

إنجي صلاح 

الشعب يريد نظام ميدان التحرير.

الشعب يريد إسقاط النظام...... قد إيه الي اخترع الهتاف ده عبقري!!!لخص مطالب الشعب كلها في كلمتين. و عشان نفهم الناس الي في التحرير دي بيعملوا إيه لازم نفهم الكلمتين دول كويس.الشعب الي هو أنا و انت و كل مصري ذاق الذل و الهوان,كل مصري اتظلم,كل مصري اتهانت كرامته,كل مصري اتخنق من الفساد و المحسوبية و الرشوة.الشعب الي خرج عشان يسقط النظام مكنش بس شباب كان شيوخ و غني و فقير و مسلم و مسيحي و مرأة و رجل و طفل و كلهم يجمعهم أنهم مصريين.خرجوا بدون إتفاق أو خطة و بدون قيادة و بدون أيديولوجيات حزبية أو دينية أوسياسية,حتى لما قرروا إن ميدان التحرير يبقى مقر الثورة كان أمر عفوي و لما قرروا الإعتصام كان تصرف عفوي برده. و الشعب ده أنشأ دولة خاصة به لها نظامها السياسي الخاص القائم على الحرية و الديموقراطية و نظام إجتماعي قائم على العدالة الإجتماعية و الكرامة الإنسانية و حتى نظام أخلاقي قائم على الشهامة و الجدعنة و المساواة و الوحدة الوطنية و إحترام الكبير و التعاون. و أساس شرعية و سلطة أي رئيس لنظام وأي سلطة في الدولة كلها هو الشعب. و بثورة الشعب سحبوا شرعيتهم من النظام كله و خلقوا شرعية ثورية هي الأساس الجديد لكل شيء يعني أي حاجة تتعمل في البلد من هنا و رايح لازم الشعب يكون راضي عنه و من حق الشعب ده إنه يعبر عن إرادته بطريقة سلمية و الطريقة السلمية دي هي المظاهرات و مينفعش من هنا و رايح يتخذ قرار معارض لإرادة الشعب,و الشعب ده  ذكي جدا و واعي و عارف مصلحته فين و لديه غريزة بقاء ثورته فيعلم تحديدا ما الخطوات التي ستضمن نجاح الثورة و استئصال الفساد و العبور بمصر إلى بر الأمان.نيجي بقى للنظام و النظام ده يشمل مبارك و أهو رحل و يشمل كل من شارك في هذا الفساد و أهدر المال العام و استولى عليه و لم يراعي مصالح الشعب في يوم و النظام يشمل أيضا من سكت عن الفساد و لم يفضحه.و النظام  ده يشمل كل  من تولى منصب قيادي في عصر مبارك سواء وزير أو عضو مجلس شعب أو محافظ أو عضو مجلس محلي أو إلخ إلخ و كذلك كل من كان في يوم من الأيام عضو في الحزب الوطني.و التطهير الشامل للبلاد يشمل أيضا إسقاط النظام الإجتماعي و الأخلاقي يعني من هنا و رايح مفيش فروق طبقية مفيش فرق بين مصري و التاني لازم كلنا نتعلم نتخلى عن التعالي و من انهاردة كل واحد فينا مسؤل و مينفعش تقول و أنا مالي لو شفت حاجة غلط غيرها و الي كان معتاد على أي شكل من أشكال الفساد لازم يتغير و هذا الفساد يبدأ من أول رمي الزبالة في الشارع حتى التزوير و الغش و برده نتعلم نعترف بأخطائنا و نتخلى عن العند والمكابرة و نعمل تجديد شامل لذاتنا يعني نيولوك لشخصياتنا و أفكارنا و طريقة تعاملنا مع الأمور و طريقة تعاملنا مع الناس من باب أولى.و يجب أن يدرس ميدان  التحرير لنا كلنا لنتعلم أخلاق الميدان و مبادئه.لو حصل كل ده الشعب هيبقى أسقط النظام و استبدله بنظام ميدان التحرير.و الشعب يريد نظام ميدان التحرير.